Herri kirol saioa Araitz-Beteluko Kultur Astean

Araxes herri kirol taldeak erakustaldi bat eman zuen Atallun abenduak 3an, Nafarroa eta Euskeraren egunean.

Erakustaldia bi zatitan banatu zen kirolarien adinaren arabera; hasieran gaztetxoen txanda izan zen eta ondoren gazte-helduen tartea izan zen. Kirolariek lan txukuna egin zuten.

Bi txandetan proba konbinatua egin zen: koxkolak, txingak, zakua, laisterra eta trontza, adinaren arabera moldatuta. Ez zen sokatira saiorik egin.

Parte hartu zuten kirolariak. Taldea halako bi ere bada gutxinez.

Araxes taldearen sorreraren hazia 2009ko Kultur Astean piztu zen. Orduan, aspaldiko partez, herri kirol konbinada saio bat burutu zen ume eta helduentzako. Partaidetza eta ikuslego oso handiak izan zituen eta saioa ikusgarria izan zen. Aurretik izan zen talde bat eta helduen kasuan partaide batzuk lan hoiek ezagutzen zituzten, baina beste batzuk inoiz ez zuten kirol hau probatu, umeak bereziki.

Saio honek izan zuen harrerak guraso batzuei umeentzako herri kirol ikastaro bat edukitzeko gogoa piztu zien. Hauek Kirol Mankomunitatera jo zuten eta hilabete gutxira dena martxan jarri zen eta gaur arte darrai.

Monitorearen hausnarketa

Herri kirol ikastaroa martxan jartzeko monitorea behar zen eta kirol koordinadoreak inor opatzen ez zuela eta, azkenean niri (Unai Ijurko) planteatu zidan. Niri, herri kirola esnatzeko aukera hori alperrik galtzeak mina emango zidala eta, onartu nuen, izan ere, 2010eko martxoa zen eta ekaina bitarteko ikastaroa izan behar zen bakarrik. 

Ongi ateratzekotan beste monitore bat aurkitzeko konpromezuz hartu nuen, hala ere, urtero, beste inor ez dagoela eta, berriz hasi eta segi nabil. Dagoeneko 13. urtea da aurtengoa eta Araxes Herri Kirol Taldea bertan sendo ezarrita dagoela eta bailarako kirolaren zati garrantzitsua dela esan daiteke. 

Ez dakit noiz arte jarraituko duten. Adinez gora noa eta kirolean odol gaztea behar da kirolariei zirrara eta indarra transmititzeko. Sasoiez oraindik ongi nago, baina inor ez da betirako. Gainera, garai batean monitorea izateko, nahia eta gogoak izatea nahikoa zen; orain tituluak behar dira eta horretarako ikastaroak egin eta gainditu behar dira. Dagoeneko hiru dira monitore batek lanean aritzeko gutxienez behar diren tituluak: Herri kirolean oinarrizko instruktorearena, Lehen sorospenena eta Umeen babes arduradunarena.

Ia urtero eskakizun berri bat dago eta honek niri, gaur egungo monitoreari, pixko bat aspertzen dit, baina hori baina okerragoa iruditzen zaiten egoerara eramaten du, hau da, hurrengo monitoreak titulu hoiek beharko ditu lanean entrenatzen hasi aurretik eta horrek denbora (denera 150 ordutik gora) eta dirua (100€ inguru) suposatzen ditu.

Dena dela, aurretik esan dudan bezala, herri kirolak sendotuta daude gurean eta ni bezalakoren bat (hobea seguruenik) agertuko da talde eta kirol eder honi segida emateko eta hurrengo mailara igotzeko.

Aupa Araxes!!! 

 

Araxes HK Sokatirako Euskal Herriko Txapelketan

Ez dago deskantsurik. Azaroak 26an Antsoainen emakumezkoen 4x4 txapelketa burutu zen eta bertan gure neskek bi taldetan parte hartu zuten. Alde batetik Araxes taldea atera zen eta bestetik Ibarra moduan, ia talde osoa gure neskez osaturik.

Bederatzi taldek parte hartu zuten eta Araxes taldeak tiraldiren bat irabaziarren, azken postuarekin konformatu behar izan zen. Ibarrako taldeak aldiz saria lortu zuen hirugarren postua lortuta.

Aurrerago, txapelketa honetan izanen dira saio gehiago modalitate desberdinetan. Ziur gure taldeak lan txukuna egingo duela, indarra eta experientzia irabaziz.

 

Nafarroako Sokatira Txapelketa 2022

  6x6 Emakumeak 380kg - Azken jardunaldia  

Noizbaiten izango zela eta azaroak 19an Elizondon jokatu zen finaleko jardunaldian lortu zuen Araxes taldeak bere lehen saria helduen mailan. Betiko talde batzuei aurre hartu eta hirugarren postua lortu zuen emozio ta lan ikaragarriz beteriko saioan. 

Saioan eginiko lana izugarria izan zen, izan ere, ohiko saioetan 8-10 tiraldi izaten badira, jardunaldi honetan 16 tiraldi egin behar izan zituzten. Hori nahikoa ez eta tiraldi guztiak berdintasun handikoak izan ziren, oso gogor eta luzeak. Talde gehienak lehertuta bukatu zuten.

Hainbeste tiraldien arrazoia berdinketa hirukoitza bi aldiz gertatu zela zen. Saioa bukatutakoan, aurreko saioko puntuak kontutan hartuta, Araxes eta beste bi talde berdinduta gelditu ziren. Hemen ligako saioaren emaitza orokorra:

Beti-Gazte: 12p / Araxes: 8p / Amaiur: 8p / Berriozar: 8p / Txantrea: 4p / Antsoain: 2p

Gauzak horrela, berdindutako hiru taldeen arteko liga berri bat egin zen, eta zer izango eta berriz ere berdinketa hirukoitza. Azken liga bat burutu zuten eta azkenean berdinketa hautsi zen eta horrela gelditu zen guztia:

Txapelketako sailkapena:

Txapelduna: Beti-Gazte / Bigarren: Amaiur / Hirugarren: Araxes / Laugarren: Berriozar / Bostgarren: Txantrea / Seigarren: Antsoain

Zorionak eta eskerrik asko, neskak!

Aipatzekoa da ere Mattiek txapela lortu zuela Lesakako Beti Gazte taldearekin. Urtetako lanak, legez merezitako saria eman dio ordainetan. Zorionak Mattie!

Aupa Araxes!!! 

 

  6x6 Emakumeak 380kg - Lehen jardunaldia  

Misto modalitatearen ondoren nesken txanda heldu zen. Azaroak 12an Barasoainen jokatu zen lehen jardunaldia eta gure neskek oso hasiera ona eman zioten, izan ere, beste talde batekin berdinduta 2. postua lortu bait zuen.

Hurrengo jardunaldiarekin amaituko da txapelketa eta merezitako sariren bat lortzeko aukera handi samarra dago. Ea oraingoan gure taldearen indarrari zorte pixko batek laguntzen dion.

Sailkapena:

Beti-Gazte: 6p / Araxes: 4'5p / Amaiur: 4'5p / Berriozar: 3p /Txantrea: 2p / Antsoain: 1p 

 

   Mistoak - Azken jardunaldia  

Bigarren eta bide batez azken jardunaldia azaroak 5ean jokatu zen Lesakan eta bertarako bazegoen lorpen handi bat lortzeko aukeratxo bat, nahiz eta zaila egon. Aurreko jardunaldian 3. postua lortu zuten eta horri eusten saiatu ziren baina zozketak egokitutako kruzeak ez zuen lagundu eta azkenean 5. postua lortu zuten. 

Denera, sailkapen orokorrean laugarren gelditu dira eta hori berez oso postu ona da, lanaren ordaina.

Sailkapena horrela geratu zen:

1.- Beti-Gazte / 2.- Berriozar / 3.- Txantrea / 4.- Araxes / 5.- Amaiur-A / 6.-Amaiur-B / 7.- Antsoain 

Hurrengo bi jardunaldietan gure nesken txanda da. Ea hemen ere hortzak estutu eta merezitakoa jasotzen duten.

Eskerrik asko, gaztek!!

  Mistoak - Lehen jardunaldia  

Urriak 22an jokatu zen Sunbillan Misto modalitateko lehenengo jardunaldia eta bertan Araxes taldeak lan oso ona egin zuen, izan ere, hirugarren postua lortu zuen. Lorpen handia da, hasiera batean behintzat bera baina talde izen handiagokoak eta printzipioz faboritoak zeudela kontutan hartuz.

Hurrengo azaroak 5ean, Lesakan, modalitate honen bigarren eta azken jardunaldia burutuko da eta bertan orain arte lortutakoari eusten saiatu beharko da gure taldea saria etxera ekartzeko.

Sailkapena horrela dago:

Beti-Gazte: 7p / Berriozar: 6p / Araxes: 5p / Txantrea: 4p / Amaiur-B: 3p / Amaiur-A: 2p / Antsoain: 1p

Aupa Araxes!!

     Sarrera     

Maiatza inguruan jokatu zen 4x4ko sokatira txapelketa eta orain 8x8ko modalitatearen txanda da eta Araxes HK taldea bertan lehiatuko da.

Lau jardunalditan lau modutako txapelketa burutuko da baina gure taldeak hoietako bitan parte hartuko du. Hauek dira modalitateak:

• Mistoak - 560kg: Aukera honetan 4 mutil eta 4 neskek tiratzen dute. Honetan Araxes taldeak lehiatuko du. Sunbillan urriak 22an eta Lesakan azaroak 5ean izanen dira.

• Emakumezkoak - 380kg: Honetan 6x6ko taldeak arituko dira eta gure neskek bertan arituko dira. Barasoainen azaroak 12an eta Elizondon azaroak 19an izanen dira.

• Gizonezkoak - 600kg: 8x8ko taldeak izanen dira eta Araxestik ez da parte hartzen ez dugulako behar adinako mutilik.

• Gizonezkoak - 640kg: Hau ere 8x8ko modalitatea da eta aurrekoaren egoera berdinean gaude taldea ezin ateraz.

Ondorengo kartelean modalitate, leku, egun eta orduen informazioa ageri da.

Gure gazteak, beti bezala, duten guztia emango dute, dudarik gabe. Aupa Araxes!!

2022-2023 ikasturtea hasi da

Aurten ere, urriarekin batera, martxan jarri da herri kirol ikastaroa. Urtero bezala bada kirolari berririk eta utzi duenik ere.

Partaide kopuru aldetik, aurreko urteetako zenbakiak gutxigatik gainditu dira. Hori bai, tamalez, nesken kopurua ttikia da mutilenekin alderatuz. Aurten 24 neska-mutiko ditugu.

Adin/mailaren arabera hiru ataletan banatuta daude, eta hauek dira aurtengo kirolariak:

• Kimuak: Jon, Eñaut, Haritza, Artizar, Adei, Alain eta Eneko.

• Haurrak: Eros, Mattin, Lander, Mikel B, Malloa, Jurgi, Hegoi, Hodei, Imanol eta Mikel A.

• Kadeteak: Conor, Eider, Iraide, Izei, Janire, Izarne, Nahiane eta Inge.

Aurtengo txapelketako datak ere ezarrita daude eta martxoak 5etik apirilak 2ra izango da. Ea aurten ere, urtero bezala, lan txukuna egiten dugun.

2021-2022 kurtsoarekin batera bere ibilbidea bukatu zuten kirolariak aipatu behar dira. Beraien ibilbidean jarrera bikaina eta lan ederra egin zuten bai saioetan bai txapelketetan eta orain guzti hori aitortzea egokitzen zaigu.

Beraz, Ibai, Bikendi, Luka eta Markel, mila esker, ongi izan eta hurrengo arte!!

Araxes HK Helduen Nafarroako Proba Konbinatuan txapeldun!!

Dudarik ez dago Araxes HK taldea proba konbinatuan ongi moldatzen dela. Denboraldi hasieran izugarria lortu zuen gaztetxoekin bi txapela irabaziz eta orain 21 urtez azpikoekin txapela irabazi dute eta helduen maila absolutoan bigarren postua bloke batean eta txapela bestean... ikaragarria!!

>> Txapelketako emaitzak <<

21 urtez azpikoen maila

Jardunaldi hontara txapeldun birtualak zirela heldu ziren baina lorpen hori zergatik lortu zuten demostratzeko erakustaldi bikaina eman zuten eta nagusitasunez berriz ere irabazi zuten. Txapeldunak dira jardunaldi guztietan irabazita, ezin hobeki. Zorionak!!

Helduen maila

Proba konbinatua bi bloketan banaturik zegoen eta bietan finalean sailkatu zen.

• 1. Blokea > Koxkolak + Txingak + Zakua + Aizkora + Korrika + Trontza

Aurreko jardunaldietako saioetan beti hirugarren postua eta aurrekoetatik denbora alde handiz atzetik sailkatu zen, baina finalean kasta atera eta bigarren postua lortu zuten, lehenengo postutik denbora gutxira (trontzako epai erdira). Lan bikaina!! 

• 2. Blokea > Ingudea + Txingak

Kasu honetan, aurreko jardunaldietan irabazi zuten eta finalean ere irabazi zuten , txapela lortuz. Hala ere, emozioa azken unera arte egon zen, txingako saioaren bukaera estu eta larriarengatik. Ingudean lehen postua eta txingan bigarrena lortuta, puntuaketaren arabera txapeldun bukatu zuten. Zorionak!!!

 

Kirolariei bere lanarengatik eskerrak emateaz gain, lagun eta senideei ere beraien animo eta jarrerarengatik ere eskerrrak eman nahi dizkiegu.

Aupa Araxes!! 

Herriz-Herri Gazte eta Helduen proba konbinatuko txapelketa

Txapelketa hau urtetan burutu gabe egon da eta talde batzuk bultzatuta, Araxes barne, berriz bueltatu da aldaketa batzuekin: emakumeen parte-hartzea eta 21 urtez azpikoen maila.

Helduen maila 

Udako saioak: Sanferminak

Pandemia garaiko azken bi urteak pasata, Sanferminetako herri kirol saioak berriz ere itzuli ziren. Araxes HK taldeak bi parte-hartze izan zituen:

• Gaztetxoen konbinadak: Sanferminetako saioan txapelketako finalistak parte hartzen dute erakustaldi moduan. Gure kasuan Kimu eta Haur mailakoak lehiatu ziren eta lan txukun samarra egin zuten ttikienek 2. postua eta ertainek 3. postua lortuz.

 

• Lauko Sokatira: Misto modalitatean izan zen eta pisu librean, gure taldearentzat inolako mesederik egin gabe. Hala ere, tiraldi txukunak egin zituzten nahiz eta azkenean pisu-aldeak erabakitzen zuen.

Talde lanaz gain, Josuk txinga txapelketan parte hartu zuen 5. postuan geldituz.

Araxes HK taldeak Beteluko Txupinazoa bota du!!

Beteluko festen antolatzaileek aurtengo txupinazoa Araxes Herri Kirol taldeak botatzeko proposamena egin ziguten eta gonbidapen horri ezin zaio uko egin. Ohore handiz jaso dugu eta ordainez, gure gaztetxoek txapelketan lortutako txapelak Beteluko herriari eskeini dizkiogu Udaletxean jasotzeko.

Txupinazoa bota aurreko hitzaldian, talde gisa gure esker ona eman diegu gurasoei, eta lagundu ziguten guztioi bai apirilak 10eko gaztetxoen txapelketako finalean nola maiatzak 14eko herri kirol egunean. 

Gaztetxoen HK taldetik eta helduen sokatirako taldetik, hau da, Araxes Herri Kirol familia osatzen dugun guztien partetik gure eskerrik bero eta zintzoena Beteluko herriari.

Aupa Araxes eta Gora San Pedro!!!  

 

2021-2022 denboraldiaren amaiera.

Ekainaren 9an burutu zen, kirol aldetik, aurtengo ikastaroko azken saioa eta ekainaren 21ean denboraldi bikainari amaiera emateko otordutxo bat egin genuen adin guztietako kirolariak elkartuz.

Urtero bada taldea adinarengatik utzi behar duen kirolariren bat eta aurtengoan Ibai izan da. Egia da bere adineko lagunik ez duela ia izan eta horrek txapelketetan denoi gustatzen zaien bezala ez dela aritu; handiagokoekin, beste talde batzuekin ibili behar izan da, baina beti lan ona eginez. Eskerrik asko Ibai hain fiña izateagatik.

Nafarroako 4x4 Sokatira Txapelketa 2022

Emakumezkoak 235kg - Azken Jardunaldia - Berriozar 2022/05/21

Amaitu da aurtengo 4x4 sokatira txapelketa eta gure neskek, bero izugarriko jardunaldian, sekulako amaiera eman zioten txapelketari. Zeinek esango zuen, Araxesek Beti Gazte (Lesaka) taldeari tiraldia irabazteko gai izango zenik... ba jardunaldi honetan gertatu zen. Lehen posturako borroka latza izan zen eta Araxesek, Beti Gaztek eta Txantreak berdinketa hirukoitza egin zuten, eta korapilo hori askatzeko hiruen arteko liga bat egin behar izan zuten, saio amaigabe bezain gogorra bihurtuz. Azkenik, nekeak jota eta oso tarte ttikiarekin beste bi taldeen atzean gelditu zen, baina betiko taldeak harrituta eta neurri batean errespetua sartuta utzi zituzten. Hemendik aurrera, Araxes ez da edozein talde. 

Beste aldetik, aurten kirolari berriak izan ditugu eta oso denbora gutxian maila nahiko on bat hartu dutela ikusi da. Indar faltarik ez dago, falta dena denborak eta ofizioak jarriko du eta kontutan edukitzeko lehiakortasunezko kirolariak bihurtuko dira.

Zorionak Neskak!! eta Aupa Araxes!!

Emaitzak

Emakumeak 235
Bigarren jardunaldia				Emaitza Orokorra
Pos.	Taldea	Puntuak		Pos.	Taldea	Puntuak
1	Berriozar	7		1	Berriozar	13
2	Txantrea	6		2	Beti Gazte	12
3	Beti Gazte	5		3	Txantrea	10
4	Amaiur	4		4	Araxes A	8
5	Araxes A	3		5	Amaiur	7
6	Araxes B	2		6	Araxes B	3
7	Antsoain	1		6	Antsoain	3

Emakumezkoak 235kg - HERRI KIROL EGUNA - Betelu 2022/05/14

Egun honetan ospatu zen, lehenengo aldiz, Herri Kirol Eguna, eguraldi eta giro bikainaz lagundurik. Goizean ume eta gaztetxoei zuzendutako herri kirolak eta jolasak egin ziren, ondoren bazkaria egon zen, arratsaldean 4x4 sokatira jardunaldia burutu zen eta amaiera ona emateko kirolarientzako afaria eta gaupasa izan zen.

Gure neskek egindako lanari erreparatuz, oso emaitza ona lortu zuten, izan ere, bi taldetako bat hirugarren sailkatu zen. Datorren asteko jardunaldian bukatzen da txapelketa eta postu honi eustea benetako erronka izango da. Beste taldeak lan txukuna egin zuen eta ofizioa hartzeko ikasgai berri bat jaso zuen.

Herri Kirol Egunaren inguruan, eskerrak ematea egokitzen zaigu: gure gazteei antolatzen eta lanean erakutsi duten inplikazio eta eraginkortasunarengatik eta gurasoei egokitutako lan desberdinetan erakutsitako jarrera eta bikaintasunarengatik.

Emaitzak

 

Emakumeak 235
Pos.	Taldea	Puntuak
1	Beti Gazte	7
2	Berriozar	6
3	Araxes A	5
4	Txantrea	4
5	Amaiur	3
6	Antsoain	2
7	Araxes B	1

 

Emakumezkoak 255kg - Azken Jardunaldia - Antsoain 2022/05/07

Bigarren jardunaldiarekin batera bukatu da emakumezkoen 255kg-ko txapelketa. Jardunaldi honetan haurreko emaitza berdina lortu da, gutxigatik bada ere puntu gutxigokin, baina sentsazio onak emanez. Talde gehienei gure aldera ekarri genien hasieran baina azkenean tiraldiak galtzen genituen. Falta zitzaigun koxka denborak eta ofizioak ematen du, baina indarra badagoela ez dago dudarik, bestela gure aldera ez zen mugituko.

Orain, maiatzak 14ean 235kg-ko txapelketa dator eta hasiera etxean, Betelun, Herri Kirol Egunarekin batera burutuko da. Egun osoko jarduera da eta kirola eta festa uztarri berean egonen dira. 

Animatu eta azaldu!!

Aupa Araxes!!

Emaitzak

Emakumeak 255
Bigarren jardunaldia				Emaitza Orokorra
Pos.	Taldea	Puntuak		Pos.	Taldea	Puntuak
1	Beti Gazte	7		1	Beti Gazte	14
2	Antsoain	6		2	Antsoain	12
3	Txantrea	5		3	Txantrea	10
4	Amaiur A	4		4	Amaiur A	8
5	Amaiur B	3		5	Amaiur B	5.5
6	Araxes A	2		6	Araxes A	4.5
7	Araxes B	1		7	Araxes B	2

 

 Mistoak 280kg - Jardunaldi bakarra - Lesaka 2022/04/30

Mistoko eran bi neska eta bi mutil aritzen dira talde bakoitzean. Araxes taldeak talde bat aurkeztu zuen lehian eta itxura ona eman zuen. Ez zen finalerdietara sailkatu baina hori lan zaila zen. Nahiz eta bere multzoan azken gelditu, aurkariak hainbat tiralditan bere aldera ekarri zituzten nahiz eta azkenean osotara ez eraman. 

Talde gazte eta berria izanik, kontutan edukitzeko lana burutu zuten. Saiatuz ikasi eta gogortu. Aupa Araxes!!

 

 Emakumezkoak 255kg - Lehen Jardunaldia - Lekunberri 2022/04/23

Hasi da 2022ko helduen Nafarroako sokatira denboraldia 4x4 modalitatearekin eta Araxes taldeak misto eta emakumezkoen txapelketetan lehiatuko da.

Txapelketa bost jardunaldietan burutuko da eta bi jardunaldi emakumezko nahiz gizonezkoen pisu altuetan, beste bi pisu ttikietan eta beste bat mistoan banatuko da.

Apirilak 23an lehen jardunaldia Lekunberrin jokatu zen, etxetik gertu. Saio hau pisu altuetakoa zen eta Araxes taldeak bi taldekin aritu zen eta saio txukuna egin zuen talde berria, kirolari berriekin osaturik zegoela kontutan harturik.

Emaitzen aldetik azken postuetan gelditu ziren, baina ederki lehiatu eta borrokatu ondoren. Hurrengo saioetan emaitza hobeak lortzea ez da harritzekoa izango. 

Emaitzak

Emakumeak 255
Pos.	Taldea	Puntuak
1	Beti Gazte	7
2	Antsoain	6
3	Txantrea	5
4	Amaiur A	4
5	Amaiur B	2,5
5	Araxes A	2,5
7	Araxes B	1